'వెర్రి ముదిరింది - రోకలి తలకి చుట్టండి' సామెత ఎందుకొచ్చిందో అర్థం అయింది

    కొన్ని వేల సంవత్సరాలుగా ప్రపంచమంతటా రావణాసురుడిని చంపినందుకు పండుగ చేసుకుంటూ ఉంటే ఇప్పుడు కంచె ఐలయ్య గారికి మాత్రం రావణాసురుడు హీరోగా కనిపించాడు. 'మూలవాసీ రారాజు రావణాసురుడు' అని కితాబిచ్చారు. అసలు రావణుడు మూలవాసీ ఎలా అయ్యాడో, ఏ చారిత్రక ఆధారం బట్టి ఆ విధంగా నిర్ణయించారో ఎంత ఆలోచించినా అర్థం కాదు. రామాయణమంతా తిరగేసినా రావణుడు వెనుకబడిన మూలవాసీతెగకు చెందిన వాడని వాల్మీకి ఎక్కడా ప్రస్తావించలేదు. రావణుడు సాక్షాత్తు సృష్టికర్త బ్రహ్మ మునిమనుమడు. అందుకే రావణుడిని రావణబ్రహ్మ అని కూడా అంటారు. అంటే రావణుడు శూద్రుడు కాడు, బ్రాహ్మణుడు. సాటి బ్రాహ్మణుడిని దురుద్దేశ పూరితంగా కుట్ర చేసి చంపాల్సిన అవసరం ఏముంటుంది? కంచె ఐలయ్య గారి హ్రస్వ దృష్టి కేవలం ఈ ఒక్క ఉదాహరణ ద్వారా విశదమవుతుంది.

    రావణుడు స్వతహాగా మహాజ్ఞాని, వేదవేదాంగ కోవిదుడు, మహా శివభక్తి సంపన్నుడు. తన భక్తితో శివుడిని ఎన్నో సార్లు ప్రసన్నం చేసుకున్నాడు. అంత మాత్రం చేత రావణుడు గొప్పవాడు, ఆరాధ్యనీయుడు అయిపోడు. అతనికున్న దుర్గుణాల వల్ల మాత్రమే పతనం అయ్యాడు. ఈ సమావేశంలో ఐలయ్యగారు ''రాముడి కంటే రావణుడు నీతివంతమైన పాలన అందించాడని'' సెలవిచ్చారు. అంటే ఏ విధంగానో కూడా చెబితే బాగుంటుంది. రాక్షసుల్ని పాలిస్తూ, వారి దుర్మార్గాలని ప్రోత్సహిస్తూ, కేవలం తన జాతి వారనే అభిమానంతో వారు ఎటువంటి అన్యాయం చేసినా, వారిని కాపాడుతూ ఉండే నేటి రాజకీయ నాయకుల్లాగా పాలించాడు. అన్యాయాన్ని, అధర్మాన్ని ప్రోత్సహించే నాయకులు ఎవరైనా చివరికి పతనంకాక తప్పదు. అదే రావణుడి జీవితం నుంచి నేర్చుకోవాల్సిన పాఠం.

    ఇక్కడ మరో ఉదాహరణ కూడా చెప్పవచ్చు. ఒక పెద్దమనిషి ఉన్నాడు. ఆయనకు ఎన్నో అవార్డులు, రివార్డులు వచ్చాయి. ఎంతో మేధావి, పాండిత్యం కలవాడు. గవర్నర్‌ స్థాయికి వెళ్ళాడు. కాని ఒక మహిళ పట్ల అసభ్యంగా ప్రవర్తించాడు. చివరికి తన పదవిని త్యాగం చేయాల్సి వచ్చింది. ఆయన పదవి కాని, అనుభవం కాని, తెలివితేటలు కాని ఏవీ ఆయన్ను కాపాడలేకపోయాయి. కేవలం అసభ్యంగా ప్రవర్తించినందుకే ఆయన అంత శిక్ష అనుభవించితే, పరాయి భార్యను అపహరించి, అధర్మంగా ప్రవర్తించి, తన తప్పు తెలుసుకోకుండా యుద్దానికి సిద్దపడ్డందుకే రాముడు రావణుడిని చంపాల్సి వచ్చింది. ఒక మనిషి ఎంత గొప్ప వాడయినప్పటికీ, అతని ప్రవర్తన మీదే అతని గౌరవం ఆధారపడి ఉంటుంది. డబ్బు, పలుకుబడి, హోదా ఇవేవీ మంచి గుణం లేనప్పుడు రాణించవు. అందుకే రావణుడు చరిత్రలో హీనుడయ్యాడు. ఇప్పుడు రావణుడిని ఆదర్శంగా తీసుకోవాలి అని గౌరవనీయ ఐలయ్య గారు ఏ విధంగా చెప్పారో ఆయనకే తెలియాలి.

    చరిత్రను తిరగరాసి, రావణాసురుడు, తాటకి, నరకాసురుడు, శూర్పణఖ వంటి వారి చరిత్రల్ని పాఠ్యాంశంగా చేర్చాలని ఆయన శెలవిచ్చారు. ఇప్పుడు మనం ఉన్న ఈ చరిత్రలో రాజకీయ నాయకులు చేసిన, చేస్తున్న పనులు చూస్తుంటే, పురాణాలలో వర్ణించిన రాక్షసులే మేలనిపించేలా ఉన్నారు. అంత మాత్రం చేత అప్పటి రాక్షసుల చరిత్రల్ని, ఇప్పటి చరిత్ర హీనులయిన రాజకీయ నాయకుల్ని ప్రజలు పాఠ్యాంశంగా చదవాల్సిన అవసరం లేదు. ఒకవేళ అటువంటి పరిస్థితి వస్తే, ఇప్పటి వరకు మనం సాధించిన నాగరికతకు, సంస్క ృతికి అర్థం లేకుండా పోతుంది.

    రాముడు కూడా ధర్మ సంస్థాపనార్థం యుద్ధం చేసాడే కాని, రాజ్య కాంక్ష కోసం యుద్ధం చేయలేదు. యుద్దంలో విజయం సాధించిన తరువాత కూడా లంకా రాజ్యాన్ని ఆయోధ్య సామంత రాజ్యంగా కలుపుకోలేదు. రావణుడి తమ్ముడు, ధర్మ బద్ధుడైన విభీషణుడిని చక్రవర్తిగా పట్టాభిషేకం చేసాడు. రావణ వధ అనంతరం యుద్ధభూమికి వచ్చిన మండోదరి కూడా తన పతిని చంపినందుకు రాముడిని శాపనార్థం పెట్టలేదు. ధర్మాన్ని విడవవద్దని చెప్పినా వినకుండా తన పతి చెఎప్పిన మాట విననందుకు ప్రాణం మీదకు తెచ్చుకున్నాడని విచారించింది. ఇదంతా రామాయణం చదివితే తెలుస్తుంది.

    రామాయణం కొన్ని వేల సంవత్సరాలుగా కొన్ని కోట్ల మందికి ఆరాధ్యనీయ గ్రంధం. అటువంటి కావ్యం మీద వ్యాఖ్యానించే ముందు, అందులోని పాత్రలపై తమ అభిప్రాయం వెలిబుచ్చే ముందు కొంచెం అధ్యయనం చేస్తే మంచిది. ఇదే మరో మతంలో చేస్తే ఏమయ్యేదో, ఎన్ని గొడవలకి దారితీసేదో అందరికీ తెలిసిన విషయమే. నోరుంది కదా అని ఇష్టం వచ్చినట్టు మాట్లాడితే, పోయేది మాట్లాడే వారి గౌరవమే. ఆకాశం మీదకి ఉమ్ము వేయాలని ప్రయత్నిస్తే, చివరికి జరిగేదేమిటో కూడా అందరికీ తెలుసు. కాని సమాజంలో బాధ్యతాయుత స్థానాల్లో ఉన్న వారు ప్రజల్ని తప్పుదోవ పట్టించేలా మాట్లాడకూడదు. చేతనయితే సమాజంలో మరింత మంచిని పెంచడానికి ప్రయత్నించాలే కాని, విపరీత ఆలోచనల్ని రేకెత్తించకూడదు. మన కులం, మన ప్రాంతం, మన భాష... ఇలా 'మనోడు' అయినంత మాత్రాన వారు ఎన్ని తప్పులు చేసినా, ఎంతటి దుర్మార్గుడయినా వాడిని వెనకేసుకు రావాలా? ఆరాధించాలా? అలా చేస్తే సమాజం భ్రష్టు పట్టిపోతుంది. ఐలయ్య లాంటి వారు ఇకనైనా తమ సంకుచిత దృష్టిని వీడి, విశాల ప్రజాహితం కోరితే బాగుంటుంది.