మనుషులు గర్జిస్తారా? మాట్లాడతారా?

సాధారణంగా మనుషులందరూ ఏదో ఒక భాష మాట్లాడుతుంటారని తెలుసు. జంతువులయితే, ఆయా జాతుల స్వభావాన్ని బట్టి వాటి భాషకి ఒకో పేరు పెట్టడం జరిగింది. అంతవరకు ఓ.కే. కానీ ఈ మధ్యన ఏ పేపర్ చదివినా, ఏ టి.వి చూసినా, ఒకతే గర్జన, ఘీంకారాలు కనిపిస్తున్నాయి. కొన్నాళ్ళ పాటు యువ గర్జన గురించి విన్నాము. బహుశా యువకులందరూ మాట్లాడ్డం మానేసి, గర్జిస్తున్నారేమో అనుకున్నాను. తరువాత కొన్నళ్ళకి మాల గర్జన, మాదిగ గర్జన, వెలమ గర్జన, కమ్మ గర్జన అంటూ అన్ని గర్జనలు వినిపించాయి. ఇప్పుడు కొత్తగా మహిళా గర్జన కూడా త్వరలో నిర్వహిస్తామని ఒక రాజకీయ పార్టీ వారు ప్రకటించారు. నాకు తెలిసినంత వరకు సింహాలు మాత్రమే గర్జిస్తాయి. మరి ఈ మనుషులు గర్జించడమేమిటో. హాయిగా మనుషులందరూ కూర్చుని మాట్లాడుకుంటే చాలా సమస్యలు పరిష్కారమవుతాయి కదా. రాజకీయ పార్టిలకి ప్రజల సమస్యల మీద ఎటువంటి చిత్తశుద్ది లేనంత కాలం, జనాలకి గేలం వేసే ఇటువంటి చౌకబారు సభలు, సమావేశాలు నిర్వహిస్తూనే వుంటాయి. నిజంగా ప్రజలకి మేలు చేసే ఏ నాయకుడిని గాని, రాజకీయ పార్టీని గాని జనం ఎప్పుడూ గుర్తుంచుకుంటారు. అటువంటి వారు ఎటువంతి గర్జనలూ చెయ్యనక్కరలేదు. హాయిగా మాట్లాడితే చాలు, జనం అర్ధం చేసుకుంటారు. అందరూ ఈ విషయం గుర్తెరిగి ఇకపై హాయిగా మాట్లాడుకుంటారని ఆశిస్తూ, అందరికీ రిపబ్లిక్ డే శుభాకాంక్షలు తెలియజేసుకుంటున్నాను.

పంచాంగం కాలండర్ మీకు నచ్చిందా?

అందరికీ మరొక్కసారి నూతన సంవత్సర శుభాకాంక్షలు,
నేను తెలుగు పంచాంగం కాలండర్‌ని అంతర్జాలంలో పెడదామనుకున్నపుడు ఈ ఆధునిక యుగంలో అందునా, కంపూటర్ వాడేవాళ్ళకి పంచాంగంతో ఏమి పని ఉంటుందా అని ఆలోచించాను. కాని నా ఊహ తప్పని తేలింది. నిన్నటి నుండి ఇప్పటి వరకు సుమారుగా 80 మందికి పైగ, ఈ ఫైల్‌ని దిగుమతి చేసుకున్నారు. చాలా సంతోషంగా ఉంది. దీనితో రెట్టించిన ఉత్సాహంతో మరిన్ని ఫైల్స్ మీకు అందుబాటులో ఉంచడానికి ప్రయత్నం చేస్తున్నాను. సాధారణంగా ప్రింటింగ్ ప్రెస్ వద్ద వుండే ఫైల్స్ ఎటువంటి అచ్చుతప్పులు లేకుండా, ఒరిజినల్ PDF files ఉంటాయి. మేము ప్రింట్ చేసే వాటిలో అందరికీ ఉపయోగపడే మంచి పుస్తకాలని వీలు దొరికినప్పుడల్లా మీకు అందజేస్తూంటాను. నా ఈ ప్రయత్నాన్ని మీరందరూ సహృదయంతో ఆదరించి అభినందిస్తారని ఆశిస్తున్నాను.
గమనిక: ఈ కాలండర్ గురించి మీ అమూల్యమయిన సూచనలు, సలహాలు నాకు తెలియచేయండి.
నిన్న download చేసుకోని వారికోసం కాలండర్ లంకెలు మరలా ఇస్తున్నాను.

rapidshare

mediafire

నా కానుక... నూతన సంవత్సర పంచాంగం కాలండర్.

తెలుగు వారందరికీ, ఆంగ్ల నూతన సంవత్సర శుభాకాంక్షలు. ఉగ్రవాదం లేకుండా ఉండాలని, ప్రేమోన్మాదులు యాసిడ్ దాడులు చెయ్యకుండా ఉండాలని, అవినీతి లేని రోజు రావాలని, మరీ ముఖ్యంగా ధరలు పెరగకుండా ఉండాలని, ఇలా చాలా కోరికలున్నాయి గాని, ప్రస్తుతానికి అవి తీరకపోయినప్పటికి, ఎప్పటికయినా తీరాలని, దానికి ఈ సంవత్సరమే నాంది కావాలని ఆశిస్తూ, ఆకాంక్షిస్తూ, నా హృదయపూర్వక శుభాకాంక్షలు తెలియచేస్తున్నాను.

ఇక, నేను ఇవ్వబోయే కానుక విషయం... చక్కటి తెలుగు పంచాంగం కాలండర్. తిరుమల తిరుపతి దేవస్తానం ఆస్తాన సిద్దాంతి అయిన బ్రహ్మశ్రీ తంగిరాల ప్రభాకర పూర్ణయ్య సిద్ధాంతి గారు రచించిన నూతన సంవత్సర పంచాంగం కాలండర్ PDF ఫైల్ ని మీకు కానుకగా అందిస్తున్నాను. మల్టి కలర్‌లో డిజైన్ చేసిన ఈ కాలండర్, దేశ, విదేశాలలో వున్న తెలుగు వారికి నచ్చుతుందని, వుపయోగపడుతుందని ఆశిస్తున్నాను. ఆ ఫైల్‌కి సంబందించిన లంకెలు ఈ క్రింద ఇచ్చాను. మీ వీలుని బట్టి ఎక్కడినుంచయినా download చేసుకోవచ్చు.

rapidshare

mediafire

మరలా మీ అందరి ముందుకు... కొత్త సంవత్సర కానుకతో

అందరికీ హాయ్,
మళ్ళీ చాలా కాలం తరువాత, మీ ముందుకు వచ్చాను. మధ్యలో ఎవో కొన్ని వ్యక్తిగత కారణాల వల్ల మీతో నా మనసులో మాట పంచుకోలేక పోయినందుకు మీరు నన్ను క్షమించాలి. నేను ఏమీ బ్లాగక పోయినా, మధ్య మధ్యలో అందరి గురించి కూడలి లో తెలుసుకుంటూనే వున్నాను లెండి. నూతన సంవత్సరం సందర్భముగా మీ అందరికి మంచి గిఫ్ట్ ఇవ్వాలనిపించింది. ఆ గిఫ్ట్ ఏమిటో మీలో ఎవరయినా ఊహించగలరా. ఒక ప్రింటింగ్ ప్రెస్ అధినేతగా నేనివ్వబోయే కానుక ఏమిటో ఊహించండి. లేకపోతే రేపటి దాకా ఎదురుచూడండి.

మరో చిన్నమాట, అందరికీ వీలుగా వుండే File sharing site ఎమన్నా వుంటే చెప్పగలరు. PDF వంటి ఫైల్స్ వంటివి. ఇక నుంచి మళ్ళా ఎప్పటిలాగానే మీ ముందుకు వస్తూ వుంటాను. మీ అందరి ఆదరాభిమానాలని కోరుకుంటూ... మీ జగదీష్.